1961-yil Nizomiy nomidagi Toshkent davlat pedagogika institutida Biologiya o‘qitish metodikasi kafedrasi tashkil etilganligi bir tomondan yuqori malakali metodist olimlarni tayyorlashda, ikkinchi tomondan biologiyani o‘qitishdagi turli mavzular bo‘yicha ilmiy tadqiqot ishlarini olib borishga imkon yaratdi.
Biologiya o‘qitish metodikasi kafedrasi faqat O‘zbekiston uchun emas, balki qardosh Qozog‘iston, Turkmaniston, Tojikiston, Qirg‘iziston respublikalari uchun ham ko`plab yuqori malakali metodist olimlar- fan nomzodlarini yetishtirib berdi.
Mustaqillik yillarida Respublika metodistlarining diqqat e`tibori o‘quvchilarning bilish faoliyatini faollashtirish masalasiga qaratildi. J.Tolipova darslarni xilma xillashtirish, noan`anaviy darslar (seminar, konferensiya, muammoli munozaralar) o‘tkazish o‘quvchilarning bilish faoliyatini faollashtirishda, mustaqilligini rivojlantirishda, puxta bilim egallashlarida katta rol o‘ynashini ko‘rsatib berdi. Bu o‘rinda biologiyadan noan`anaviy darslar o‘tkazishga (hamkorlikda o‘qitish konferensiya darslari modulli ta`lim va h.k) qaratildi.
O‘zbek biolog olimlari botanik, fiziologik, biologik atamalarning izohli lug‘atini tuzishga muvaffaq bo‘ldilar. (A.Zikiryayev, S.S.Fayzullayev).
Kafedra professor-o‘qituvchilari tomonidan umumiy o‘rta ta`lim maktablari uchun ko‘plab darslik va metodik qo‘llanmalar yaratilmoqda. Ulardan T.I. Is'hoqov tomonidan chop etilgan “Maktab o‘quv tajriba uchastkasida zoologiyadan amaliy mashg‘ulotlar” (Tashkent: O‘qituvchi, 1964); «Mahalliy materiallardan umumiy biologiya kurslarida foydalanish» A. T. G‘ofurov (Tashkent: O‘qituvchi, 1970); “Metodikaning politexnik ta`limdagi ayrim muammolari” S. K. Xabirova (Tashkent: O‘qituvchi, 1974); «Maktab biologiya kursida tabiatni muhofaza qilish tushunchalarini shakllantirish» A. T. G‘ofurov, O. Nosirov (Tashkent: O‘qituvchi, 1984); «Botanikadan ekskursiyalarni tashkil etish va o‘tkazish metodikasi» M. M. Mahkamov, A. T. G‘ofurov (Tashkent: O‘qituvchi, 1985) kabilarni sanash mumkin.
Kafedra «Biologiyani o`qitish metodikasi» nomi bilan sobiq Ittifoqda Moskva, Leningrad pedagogika institutlaridan keyin uchinchi bo`lib Nizomiy nomidagi Toshkent davlat pedagogika instituti tabbiyot-geografiya fakulteti qoshida tashkil etilgan. Dastlabki davrda uning tarkibi 1 dotsent, 2 fan nomzodi, 3 katta o`qituvchi, 2 assistentdan iborat bo`lgan.
Kafedrada biologiya o`qitish metodikasi fanidan tashqari darvinizm, genetika va seleksiya asoslaridan ham talabalarga bilim berilishi e`tiborga olinib, u O`zbekiston Xalq ta`limi Vazirligining buyrug`iga binoan 1987-yildan boshlab «Biologiya va uni o`qitish metodikasi» deb nomlandi.